Djali i Fidel Castros ka vrarë veten. Fidel Ángel Castro Diaz-Balart, 68-vjeçari, i biri i ish-udhëheqësit të Kubës, u gjet mëngjesin e djeshëm i pajetë.
Thuhet se ka vuajtur nga depresioni dhe ne kushte te tilla i ka dhënë fund jetës, raporton BBC.
Djali i parë i presidentit të ndjerë u quajt “Fidelito”, për shkak të ngjashmërisë familjare.
Ai ishte një fizikant bërthamor, i trajnuar nga ish-Bashkimi Sovjetik.
“Fidel Castro Diaz-Balart, i cili ishte trajtuar nga një grup mjekësh për disa muaj për shkak të depresionit të thellë i dha fund jetës”, raportoi gazeta zyrtare e Kubës, Granma.
Televizioni shtetëror tha se ai kishte marrë trajtim mjekësor si një ambulator në muajt e fundit, pas një qëndrimi në spital.
Në kohën e vdekjes së tij, ai ishte këshilltar shkencor për Këshillin e Shtetit Kuban dhe ai shërbeu si nënkryetar i Akademisë së Shkencave të Kubës.
Ai drejtoi programin bërthamor të ishullit nga 1980 në 1992, përpara se të pezullohej pas kolapsit të Bashkimit Sovjetik.
Castro Diaz-Balart erdhi pas martesës së shkurtër të babait të tij me Mirta Diaz-Balart, vajzën e një politikan të shquar para revolucionit.
Familja e nënës se tij mbeti figura më e shquar në komunitetin anti-Kastro në Florida. Babai i tij, Fidel Castro, i cili ka qenë një nga udhëheqësit politikë më të gjatë në botë, vdiq dy vite më parë.
